ما بــيـدقش على بــابها

[هامس القلوب]

ما بيدقش على بابها


برغم انه
ما بيدقش على بابها
لكن بابها
يدق بشوق على إيده
ولد غلبان
ما لوش في السكة دي خالص
ومش فاهم ولا حاسس بإيه نابها
ولا شايف
نيران بتشب فـ شبابها
ولا عارف نيران الشوق وتاثيرها
وحيدة برغم كوم اللحم في سريرها
راجل خايب
واخدها جنينة بتخضر
برغم انه عجوز الجذع وجذوره
بتتهالك
لكن مالك
لميت فدان وعربية
وفيلا كبيرة في المنيل
وزي الكلب بيريل
إذا شافها
وساعة الحظ لو تيجي
بيتنيل
يروح يجري كما العيل
ولو هاتقول بإن الست باعتله بماله كل ما تملك
فإعذرني
دا هيه اتباعت امبارح بأرخص سعر
وما تسألش مين باعها ولا جابها
يعود مرجوعنا للحارق عيونها بدمعة لو ينظر
تشد الواد من السلم
لا هو البيه ولا معلم
ولا اتعلم
فنون الحب في الجامعة
ولا سياسي
ولا إخوان
ولا شيوعي
ولا حاجة
ولكن للهوى أحكام
ولما النار بتتحكم
تولع كل من عايز يطفيها
خلاص سلم
ما هو التاني لا عنده فلوس ولا شقة غير أوضة
تلمه ويا مرتبته على لحافه اللي غطاهم
في ساعة ذنب متكرر فـ ستين بيت من الشارع
يمد إيديه
ويفرك زي متحرَّق
ويتذكر
سنين راحت عليه اكتر من اللي جاي
ما لوش في الاوضة غير ذكرى وحتة ناي
مع سجارة وتفل الشاي
وتولع جتته فجأة
فيقلع توب عليه ساتره
وينزل جري عـ السلم
يدق بشوق على بابها
وهي بتقل بتقول مين
دي بتقول مين !!!
برغم ان النفس سمَّع لحدِّ الصين
ما فيش غيره
ويسكت حسه زي جنين
في بطن امه
وعايز يخرج الدنيا
فتفتحله
ونفسه الدنيا تفرحله
خلاص بالغصب خد حقه اللي مش حقه
خلاص هايخش للدنيا
ما هيَّ الدنيا دي دنيا
دخل عطشان
وهي دموعها سابقاها
من الفرحة
وقامت لبست الطرحة
عشان تفرح
عشان هاتكيد عجوز خايب
لكن في السر هاتكيده
وهاتزيده ركوب وركوب
وتضرب عرضه بالمركوب
وزي ما خدها غصب فـ غصب
فهي كمان
هاتجعل عرضه شخشيخة
وهيَّ ايام وبتعدي
ويبقى الواد ماهوش غلبان
ولا هي بعفة تبان
ولا الراجل بسنُّه يتوب
يروح يصطاد كمان واحدة
راجل حيوان
ما هوش فاهم
ولا هما كمان فاهمين فاهمين
بإن النار بتحرقهم وهما نيام
بجد النار بتحرقهم وهما نيام
__________________

فارس الشعر

*****************************
**************************
***********************
********************
*****************
**************
***********
********
******
***
**
*
[عزيزي الزائر يتوجب عليك التسجيل لمشاهدة الرابط]

والأن أجلس .. والأمطار تجلدني ..

على ذراعي .. على وجهي .. على ظهري ..

فمن يدافع عنى ؟

تحياتى لكل من يقراء الشعر ويارب ينول اعجابكم
((هــــــــــامس الاحــــــــزان ))